Кәсіпкерлердің құқығы қаншалықты қорғалып жүр? Бүгін "Қазына" бизнес орталығында облыстық кәсіпкерлер палатасының кәсіпкерлердің құқығын қорғау және сыбайлас жемқорлыққа қарсы іс-қимыл жөніндегі кеңесінің кезекті отырысы өтті. Онда Алға ауданына қарасты "Сығылай" шаруа қожалығынан түскен арыз-шағым тыңдалды. Мал шаруашылығымен айналысатын кәсіпкер аталған кеңес атына аудандық әкімдіктен қысым жасалғандығы туралы шағым түсірген. Жыл басынан бері облыстық кәсіпкерлер палатасына 40-қа жуық арыз-шағым түскен. Жазбаша шағымдар орта және шағын бизнес өкілдеріне тиесілі жерлердің уақытылы берілмеуі, құжатты кешеуілдетіп рәсімдеу, қысым көрсету секілді мазмұнда. Бүгінгі кеңесте кәсіпкерлер өздерінің түрлі заңбұзушылықтарға тап болатындығын жеткізді. Әсіресе аудандардан келген кәсіпкерлер "бармақ бастылықпен" жиі ұшырасамыз дейді. Кеңеске қатысқан "Сығылай" шаруа қожалығының өкілі біраз айдан бері шешілмей жүрген мәселесін ортаға салды. Мал шаруашылығымен айналысатын кәсіпкер ауданнан берілген жер бөлігінің игілігін көре алмай отыр. Әуелде қожалық иесіне уәде етілген жер учаскесін әкімдік үй тұрғызу үшін екінші бір адамға беріп жіберген.
Кеңесте талқыланған мәселе нақты шешімін тапқан жоқ. Екі тараптың мәселесі аудан әкімдігінде қаралатын болады. Шағын кәсіппен айналысып жүрген тұлғалар кез-келген уақытта жеке мәселелері бойынша облыстық кәсіпкерлер палатасына жүгіне алады. Сарапшылар кәсіп иесіне сұрағы бойынша толыққанды ақпарат беруге міндетті. Өткен айда мұндай қабылдауға 20 кәсіпкер келген. Басым көпшілігі мал шаруашылығына байланысты субсидия алған аудандық шағын бизнес иелері.