"Арамыз жылып қалар". Т. Ахтанов атындағы облыстық драма театрында жаңа театр маусымының ашылуына әзірленген премьера осылай аталады. Отбасылық драма қазақ труппасы әртістерінің қатысуымен әзірленген. Көрермендерге жол тартпас бұрын қойылымға бүгін көркемдік кеңес мүшелері баға берді. Сұлтанәлі Балғабаевтың "Ғашықсыз ғасыры" талай сахнада қойылып жүрген драма. Ахтанов театрының әртістері бұл драманы өздерінше ойнайды. Авторынан келісім алып, спектакльдің атауына дейін өзгерткен. "Арамыз жылып қалар " қойылымы бірнеше қайтара дайындықтан кейін бүгін комиссия назарына ұсынылды. Бүгін көркемдік кеңес құрамы жаңа спектакльді көрермендер назарына ұсынуға рұқсат берді. Рольдерді театрға жаңа қабылданған жас актерлер де сомдайды. Драма қоғамдағы отбасылық құндылықтардың арзандап, адамдар арасындағы махаббат сияқты ұлы сезімнің азайып бара жатқанын көрсетеді. Ессіз ғашық болған жас жігіт ақылды да сымбатты сұлу қыздың жүрегін жаулап алуға жанталасады. Бұл жолда өзіне адал деген адамы жүрегіне сызат түсіріп, бас кейіпкер махаббат машақатын бастан кешіреді.Премьера ертеңге жоспарланған. Театрда көрермендер үшін орын саны шектеулі. Шағын залға 40 адамнан артық кіргізілмейді. Ал театрдың үлкен сахнасында жөндеу жұмыстары әлі аяқталмаған.