Ақтөбелік ірі компаниялар жұмысшыларына 115 миллион теңгеден астам жалақы қарыз. Арасында банкротқа ұшырағандары бар. Ондай мекемелердің мойнында жұмысшыларының соңғы 3 жылғы еңбекақылары тұр. Бұл жөнінде облыстың бас мемлекеттік еңбек инспекторы мәлім етті. Өкінішке орай өңірімізде жұмысшылардың көз жұму немесе жарақат алу жағдайлары көбеймесе, азаймай тұр. Соңғы уақытта аймақта өндіріс қарқын алып келеді. Мүмкін көрсеткіштерге мұның да әсері болар. Былтыр өз жұмыс орнында 122 адам зардап шеккен. 16 жұмысшы қаза тапты. Осы жыл басталғалы екі адам жұмыс орнында көз жұмды. Осы жылды елдің еңбек министрлігі "Қауіпсіз жыл" деп жариялаған. Мемлекеттік еңбек инспекторлары және құзырлы органдар тарапынан кәсіпорындарға бақылау күшейе түсті. Былтырдан бері 915 тексеру жүргізілген. 1500-ден аса кемшілік анықталды. Оның көбі еңбек қатынасы заңдылықтарының бұзылуына қатысты. Жұмыс берушілер 38 миллион теңге айыппұл өтеген. Еңбек басқармасына түсетін барлық өтініштер мен шағымдардың 80 пайызы жалақының уақытылы төленбеуіне қатысты. Биылғы басты тапсырма ең төмен жалақы алатындардың еңбекақысын өсіру. Қазір қазақстандықтардың ең төменгі жалақысы 42 мың 800 теңге деп бекітілген. Жұмыс берушілер осы мөлшерден асса жалақыны көтермеуге болады деген қате пікірде болуы мүмкін. Алайда, компанияда ең төменгі жалақы 100 мың теңге болса, жұмыс беруші алдымен сол адамның жалақысын өсіруі тиіс деген сөз.