Ақтөбеде бүгін блок-бекеттер толық алынды. Енді шаһарға кіріп-шығуға ешқандай кедергі жоқ. Өңірде 78 күн бойы жолды бөгеп тұрған 28 блок-бекет толықтай алынды. Қалаға өткізу жағынан ең ірісі - "Самара-Шымкент" тас жолының бойындағы бекет. Бүгін бетон қоршауларды арнайы техника мен манипулятор көліктер тиеп әкетті. Ел басына түскен ауыр күндерде борышын абыроймен атқарған полиция инспекторы Жандос Ешманов қызмет барысында заңға құлақ аспағандар да табылғанын айтады. Өңір бойынша тіркелген мың жарымнан астам құқық бұзушылықтың үштен бірі блок бекеттерде болған. Облыс бойынша карантин кезінде 1300-ге жуық қызметкер күшейтілген тәртіпте тосқауыл бекеттерінде жұмыс істеді. Мамандар екі ауысымда қызмет етті. Физикалық және моральдық ауыртпалықтарға қарамастан, өз міндеттерін абыроймен атқарып шықты. Короновирус инфекциясымен күреске үлес қосқандары үшін алғыс хаттан бөлек 1 айлық жалақы көлеміндегі ақшалай сыйға ие болды. Ақтөбеде әлі карантин аяқталған жоқ. Полиция департаменті әрбір азаматты қалаға себепсіз кіріп шығудан аулақ болуға шақырады. Сондай-ақ, барлық санитарлық нормаларды ұмытпай, тазалық шараларын қатаң сақтау қажет. РФ шекарасында орналасқан 2 блок бекет алынған жоқ. "Жайсаң" мен "Әлімбет" бекеттерінен ешкім жіберілмейді.