Ақтөбеде көпбалалы аналарға арналған бизнес- тренинг басталды. Тренинг екі күнге жалғасады. Қысқа мерзімді курстарды өңірлік кәсіпкерлер палатасы ұйымдастырып жатыр. Әйелдер бизнесте тұрақты табыс табудың жолдарын, кәсіппен айналысудың қыр - сырын үйренеді. Сонымен қатар, тренингте мемлекет тарапынан қолдау тапқан жобалар мен несиелеу бағдарламалары таныстырылады. Айта кетейік, тренинг тегін өткізіліп жатыр.
Көпбалалы аналарға арналған бизнес - тренингке 20 - дан астам әйел қатысып жатыр. Екі күнге жалғасатын тренингте келіншектер жеке кәсіп ашуды, интернет - дүкен құруды, әлеуметтік желілерде өз парақшасын жүргізуді үйренеді. Бизнес - тренерлерден түрлі кәсіптік идеялар алып, жүзеге асырудың қыр - сырымен танысады.Бизнес - тренингке қатысушы көпбалалы аналардың бірі - Индира Иктиярова. Бүгінде ол 5 баланың анасы. Қазіргі кезде кондитерлік тағамдар пісірумен айналысады. Айтуынша, бастаған бизнесін әрі қарай дамыту үшін білімін жетілдіргісі келеді.
Бұл бизнес - тренингте аналар бала күтімімен қатар алып жүруге ыңғайлы қарапайым бизнес түрлерін жүргізуді үйренеді. Сонымен қатар, өз кәсібін дөңгелеткісі келетін аналарға мемлекет тарапынан қандай қолдаулар бары айтылды. Өңірлік кәсіпкерлер палатасында келесі айда да дәл осындай бизнес - тренинг өткізу жоспарда бар.