Ақтөбеде биыл 4 адамды пойыз қаққан

Темір жол бекетінде көбіне ұрлау фактісі орын алады. Ұялы телефонын жоғалтып, шағымданатын жолаушылар көп дейді тәртіп сақшылары. Сондықтан олар қала тұрғындары мен қонақтарына жиі түсіндіру жұмыстарын жүргізіп отырады. Желілік полиция жыл басынан бері 31 жедел тежегішті басу дерегін, темір жолда мал жаюдың-20, белгіленбеген жерден өтудің-11 фактісін тіркеген. 31 құқықбұзушылық анықталса, 29-ы әкімшілік жауапкершілікке тартылған.
Желілік полицейлер шойын жолды белгіленген арнайы жерден ғана өту керектігін ескертеді. Құлаққап тақпаңыз, өйткені келе жатқан пойыздың дыбысын есітмей қалуыңыз мүмкін. Балаларды темір жол маңына жолатпаңыз. Жыл басынан Ақтөбеде 4 адамды пойыз басып кеткен. Оның үшеуі қаза тапты. Біреуі мүгедек болып қалды. Мәселен, осыдан 1 ай бұрын Жіңішке стансасы маңында, 17 жастағы қыз баланы пойыз қаққан. Жасөспірім рұқсат етілмеген жерден өтпек болыпты. Алған жарақатынан қыз бала тіл тартпастан көз жұмған.

Количество показов: 636
Дата создания: 01.08.2024 15:01:26