Ақтөбеде қантқа байланысты дүрбелең басылар емес. Бүгін 11-ші мөлтек ауданда орналасқан "Табыс" коммуналдық дүкенінде жұрт таң атпай шу шығарды. Мұнда шекер жұма күннен бері жоқ көрінеді. Әлеуметтік арзан бағамен ұсынылатын шекерге халық таңғы 7- ден бастап кезекке тұрған. Ал оның сөреге қашан түсетіні белгісіз. Жасы 90-ға таяған Галина Дубовик тамаққа таласатын күн туды деп жылап тұр. 86 жастағы тыл ардагері ашаршылық пен соғысты да көргенін айтады. Енді міне, 4 күннен бері шекердің соңында жүр. Шілденің орталап, тамызға қарай жақындаған сайын, қалада қанттың жыры күшеюде. Тұрғындар әлеуметтік дүкендерді торуылдап, кезекке сағаттап тұруға дайын. Тіпті тізім жасап, қағазға алушылардың есімін тіркеп те қойған. Коммуналдық дүкен иесі де жұмадан бері қант жоқ екенін жасырмайды. Екі күн демалыстан кейін тапсырыс беріп үлгермеген. Бүгін кешке дейін 50 келі қант жеткізілуі тиіс,деді. 1 қап шекер 10 минуттың ішінде өтіп кететіндігін айтады. Әлеуметтік дүкендерде қанттың келісі 363 теңгеден. Арзан бағадағы шекер дүкен сөрелерінен әп-сәтте ғайып болыпжатыр. Адам басына үш келіден артық берілмейді. Билік басындағылар болса, өңірде қант тапшылығы жоқ, деп сендіруде. Ал үкіметтегілер қантқа қатысты Қазақстанда жағдай тұрақты деуден жаңылмай келеді. Бүгінгі күні елде қант қоры 26,8 мың тонна. Ауыл шаруашылығы министрлігінің дерегінше, елімізде шілде айында 37 мың тонна қант өндіріліп, 39,7 мың тоннасы сырттан жеткізіледі. Үкімет отандық қант нарығындағы жағдайды тұрақтандыру жөніндегі 5 жылға арналған іс-шаралар жоспарын мақұлдады. Жоспарға сай, қант қызылшасын егу алаңдары ұлғайтылмақ, суару желілері қайта құрылады, қант зауыттары жаңғыртылуы тиіс. Айта кетейік, қазір елімізде қант шығаратын үш зауыт қана жұмыс істеп тұр. Олар-Тараз қант зауыты, Меркі мен Көксу қант зауыттары.