"Ақтөбе-Астрахань" тас жолында жол-көлік апатынан екі адам көз жұмды. "Lada Largus"автокөлігінің 29 жастағы жүргізушісі Ақтөбе қаласынан Бестамақ ауылына қарай жолға шыққан. Такси жүргізушісі алда келе жатқан көлікті басып озу кезінде қарсы бағытқа шығады. Сол кезде 59 жастағы жүргізуші басқаруындағы "ГАЗ - 5312" жүк көлігімен соқтығысады. Осылайша асығыстың ақыры орны толмас қасіретпен аяқталды. Осы апттан тағы алты адам зардап шеккен.
Оқиға кеше түсте "Ақтөбе-Астрахань" тас жолында болды. "Lada Largus" такси көлігіне отырғандар Ақтөбе қаласынан Бестамақ ауылына қарай бет алған. 29 жастағы таксист алда келе жатқан көлікті басып озып, қарсы бағыттағы "ГАЗ - 5312" жүк көлігін қатты жылдамдықпен ұрған. Салдарынан жеңіл көліктің жүргізуші отырған жағы жапырылып, артындағы екі жолаушы сол жерде жан тапсырды. Оқиға орнында 8 адам болған. Саутамтығы қалмаған 1 көліктің ішіндегі 5 адам ажалдан аман қалды. Қазір облыстық жедел жәрдем ауруханасына 6 адам жатқызылды. Жағдайлары орташа ауырлықта. Жарақат алғандардың 4-еуі ер адам, екеуі әйел. Олардың ең үлкені 59 жаста болса, ең жасы 29 жаста.
Жыл басынан бері "Ақтөбе-Астрахань" тас жолында 16 жол оқиғасы тіркелген. Одан 3 адам қаза тауып, 24 адам дене жарақатын алған. Жол-көлік оқиғасының басым бөлігі жүргізушілердің жылдамдықты асырып, қарсы бетке шығуынан болады . Тәртіп сақшылары ақтөбеліктерді жол қозғалысы ережелерін сақтауға шақырады. Себебі асығыстықтың ақыры орны толмас қасіретке әкелуі мүмкін.