"Қазір бос жұмыс орындары көп". Қалалық жұмыспен қамту орталығының қызметкерлері тұрғындар үйде отырып-ақ жұмысқа орналаса алатынын айтты. Ол үшін "Еңбек" биржасына түйіндемесін жіберсе болғаны. Орталыққа 1800 адам тіркелсе, биыл оның 1200-і жұмыспен қамтылып, жұмыссыздар қатары 600 адамға азайған. Қалған азаматтарға да "Жұмыспен қамту" бағдарламасы аясында жаңа жұмыс орындары ұсынылады. Мамандардың айтуынша, орталыққа тіркелген тұрғындардың көбі ресми жұмыстан бас тартады немесе жалақы аз деген сылтаумен құлықсыздық танытады. Маусым айының басында еңбек жәрмеңкесі өтті. Оған 126 адам қатысып, 83 адам жұмыс берушімен әңгімелесуге жіберілген. Нәтижесінде 65 адам жұмысқа орналасты. Ал келесі еңбек жәрмеңкесі қашан өтетіні белгісіз. Сонымен қатар, "Бастау" жобасына қатысқан 126 тұрғын кәсібін ашу үшін 555 600 теңге көлемінде қайтарымсыз грантқа ие болды. Төтенше жағдай кезінде ақысыз еңбек демалысына шыққандар жұмыссыздар қатарын көбейткен. Сәуір айында карантинге байланысты табыссыз қалғандар әлеуметтік төлем алды. Көктемдегі төтенше жағдай кезінде 42 500 теңгені екінші рет ала алмаған тұрғындардан желтоқсан айына дейін өтініштер қабылданады. Естеріңізге сала кетейік, республикада төтенше жағдай жарияланғанға дейін жұмыссыздық деңгейі 4,8 пайыз шамасында болған. Ал жыл соңына дейін бұл көрсеткіш 5, 9 пайызға дейін өспек. Еңбек және халықты әлеуметтік қорғау министрі Біржан Нұрымбетов осылай деп мәлімдеді. Сонымен қатар, министрлік биыл 1 миллион 200 мыңнан астам адамды жұмыспен қамтуды жоспарлап отыр.