25-ші мамырда қалада 82 мың 174 оқушыға онлайн режимде соңғы қоңырау соғылады. Олардың 3152-сі мектеп бітіргелі жатыр. Түлектердің 229-ы "Алтын белгіден", 125-і "Үздік аттестаттан" үміткер. Түлектердің мектеппен қоштасу кеші 3-4-маусым күндері мектеп ауласында өтеді. Карантин жағдайында кешті өткізу алгоритміне сай, арасына 20 минут үзіліс салып, әр бітіруші кластың жиыны 40 минуттан артыққа созылмайды. Бүгін мектеп оқушылары үшін 2019-2020-шы оқу жылындағы тоқсандық жиынтық бағалаудың соңғы күні болды. 25-мамырда балалар жазғы демалысқа шығады. Соңғы қоңырау соғу салтанаты онлайн режимде өтеді. Оқушылар мен ата-аналар, ұстаздар, телеарналардан "Сәт сапар, жас түлек!", "Ұстаздарға мың алғыс", "Мектеп-білім ордасы", "Көңілді жазғы демалыс" сынды білім тақырыбындағы бағдарлама, сюжеттерді тамашалай алады. Ұлттық бірыңғай тестілеу 20-шы маусым мен 5-шілде аралығында өтуі мүмкін. Бұл нақты мәлімет емес. Оның қалай өткізілетіні де әлі белгісіз. Қалалық білім бөліміндегілер ҰБТ туралы қосымша хабарлайтын болады.