"Нұр Отан" партиясы жанындағы Балалардың құқықтарын қорғау жөніндегі республикалық кеңес бүгін өңірдегі жұмысын қорытындылады. Аймаққа 16-қыркүйекте келген 4 жұмыс тобы екі күнде облыс орталығы мен 9 аудандағы 70-тен астам нысанды аралап көрді. Облыстағы көп балалы аналарға берілетін пәтерлер, әлеуметтік жағдайы төмен отбасыларға көрсетілген қолдаулар мен тұрмыстық зорлық-зомбылық көрген қыз-келіншектер үшін жасалған жағдайлар кеңес мүшелерінің көңілінен шыққан. Дегенмен, мәселе де жоқ емес. Жасөспірімдердің арасындағы жұмыс күшейтілуі тиіс дейді жұмыс тобының жетекшісі Рысты Жұмабекова. Жасөспірімдердің арасында ғана емес түсіндіру жұмыстарын халық арасында да кеңінен жүргізу қажет. Өңірде жыл басынан бері 45 жасөспірім қыздың жүкті болып қалғанын бұған дейін де хабарлаған едік. Екеуі 13 жаста. 16-қыркүйекте облыстық әкімдікте өткен жиында Рысты Жұмабекова білім, денсаулық сақтау басқармалары мен полиция департаменті қызметкерлеріне жүкті болған 13 жастағы қыздар туралы толық ақпарат беруді тапсырған болатын. Мәлімет берілген. Темір және Байғанин аудандарына сапарлап барған жұмыс тобының мүшелері 20-дан астам нысанды аралаған. Жетістіктері де, кемшіліктері де анықталған. Мәселен, Темір ауданында балалардың құқықтарын қорғайтын әдіскер жұмысын бастапты. Тіпті, мүмкіндігі шектеулі балалар үшін инвотакси де қызмет көрсетеді. Бүгін кеңес мүшелері облыста орамал мәселесінің де оңтайлы шешіліп келе жатқанын айтты. Білім ошағының ережесіне бағынғысы келмейтіндермен ақсақалдар, имамдар, арнайы мамандар әңгімелесіп жүр. Қазір аудан әкімдері де үлес қоса бастаған.