Ақтөбеде жүк көліктерінің қозғалысына шектеу енгізілді. 10-шы сәуірден бастап қаладағы "Оңтүстік айналма жолдың" 21-ден 35-ші шақырымы арасында транзиттік жүк автокөлігіне жүруге болмайды. Бұл учаскеде жол жөндеу жұмыстары жүріп жатыр. Ал жеңіл көлік иелеріне "Курсант" тас жолы ашық. 41-ші бекет жағынан Ясный ауылын айналып өтетін уақытша айналма жол да қарастырылған. Аталған айналма жол 41-ші бекет тұрғындары мен Ясный ауылынан қатынайтын жүргізушілерге қиындық туғызып тұрған болатын. Бұл жермен дамылсыз өтетін 30-40 тонналық ауыр жүк көліктері жолдың ойранын шығарған. Енді "Оңтүстік айналма жолының" 21,5-тен 35,3-ші шақырымға дейінгі бөлігі тегістелмек. Жеңіл көлік жүргізушілері үшін Ясный ауылын айналып өтетін уақытша қосалқы жол қарыстырылған. Ал Алға қаласы жағынан "Ақтөбе-Орынбор", "Ақтөбе-Орск", "Ақтөбе-Хромтау" бағытына жүретін жүк көліктері үшін "Солтүстік айналма жолы" арқылы қатынау қарастырылған. Шектеу 10-сәуірден бастап күшіне енді. Ережені бұзған жүргізушіге әкімшілік айыппұл салынбақ. Ал жол бөлігінің қай уақытқа дейін жабылғаны әзірге белгісіз. Жөндеу жұмыстары біткен бойда, ашылады, деді басқарма өкілі.