Өңірімізде жыл басында "СНПС-Ақтөбемұнайгаз" және "Қазхром" ТҰК" АҚ орын алған еңбек дауы оң шешімін тапты. Жұмыс беруші мен жұмысшылар арасында келіссөз жүргізіліп, ірі кәсіпорындар қызметкерлерінің жалақысын 50 пайызға өсірген. Бұл туралы бүгін өңірлік коммуникациялар қызметі алаңында брифинг өткізген облыстық еңбек инспекциясы басқармасының басшысы Абдухат Мырзалин мәлімдеді. Ведомство алғашқы жарты жылдықты қорытындылады.
Елімізде ең төменгі жалақы 42 500 теңгеден 60 мың теңгеге дейін өсті. Бұл шешім заңды күшіне 1-қаңтардан бастап енген болатын. Еңбек кодексіне сәйкес жұмыс берушілер жұмыскерлерге ең төменгі жалақыны осы деңгейде қамтамасыз етуі тиіс. Ал облысымыздың бас еңбек инспекторының айтуынша, Ақтөбеде орташа жалақы 200 мың теңгеге жақындайды. Ал мұнай саласында қызмет ететін жұмысшылардың жалақысы 250 мың теңгеден басталады. Бұл батыс өңірлері бойынша ең төмен көрсеткіш, дейді еңбек иснпекторлары. Әйтсе де, қаңтар оқиғасынан кейін өңіріміздегі ірі кәсіпорын жұмысшыларының жалақысы 50 пайызға өскен. Атап айтсақ, "Казхром" ТҰК" АҚ мен "СНПС-Ақтөбемұнайгаз" АҚ қызметкерлерінің айлығын өсірді.Бүгінгі жиын барысында ереуіл ұйымдастыратын жұмысшыларға қатысты да айтылды. Мәселен, жұмыс берушімен арадағы дауды шешу үшін жұмысшы ереуліге шыға алады. Конституцияда солай жазылған. Алайда, кейін татуласы рәсіміне қатыспаса бұл наразылығы заңсыз деп танылады екен. Ал жұмыс беруші болса, жұмысшының талабын үш жұмыс күнінің ішінде қарап, жауап беруге міндетті.