Өңірдің ауыл шаруашылығы саласының 60-қа жуық еңбеккері марапатқа ие болды. Үздіктерге ҚР ауыл шаруашылығы министрлігі, облыс әкімі атынан төсбелгілер, құрмет грамоталары мен алғыс хаттар табысталды. Кеше облыс басшысы Оңдасын Оразалин Мәртөк ауданында ауыл шаруашылығы, тамақ және өңдеу өнеркәсібі қызметкерлері күніне арналған салтанатты шараға қатысты. Жиналғандарды құттықтап, марапаттарын тапсырды. Облыс әкімі биыл агроөнеркәсіп кешенінің қызметкерлері еңбекқорлығымен оң нәтижелерге қол жеткізгенін атап өтті. Марапатқа ие болғандардың ұзын саны 62 адам. Барлығы дерлік- ауыл шаруашылығы саласының озаттары мен ардагерлері. Оларға төл мерекелері күні ҚР Ауыл шаруашылығы министрлігінің төсбелгісі, медаль мен құрмет грамоталары, "Алғыс хат" табыс етілді. Облыста өткен он айда жаңадан 861 шаруа қожалығы құрылған. Суармалы алқаптардың көлемі өсіп келеді. Мүйізді ірі қара, жылқы ұстаушылар көбейген. Ауыл шаруашылығы саласында 34 мыңға жуық ақтөбелік еңбек етеді. Биыл ауыл шаруашылығы тауарларын өндірушілерді субсидиялауда 24 млрд теңге жаратылды. Бұл 2020 жылмен салыстырғанда 25 пайызға көп. Салтанатты шара концерттік бағдарламамен жалғасып, ауыл шаруашылығы техникалары мен мал және ауыл шаруашылығы өнімдері қойылған көрме ұйымдастырылды. Мәртөк ауданы өңірдегі шаруашылығы жүйелі жүріп тұрған аймақтар қатарына жатады. Аудан кәсіпкерлері денсаулыққа пайдалы дәрілік шөптерді пайдаланып, фито-дәрумендер шығаруға бет бұра бастаған.