Облыс коронавирус инфекциясының таралу көрсеткіші бойынша "жасыл" аймаққа оралды. Енді аймақта карантиндік шектеулер жеңілдей түсуі мүмкін. "Жасыл" аймаққа енген өзге өңірлерде талаптар бәсеңдеп жатыр. "Жасыл" аймаққа қазір еліміз бойынша жеті бірдей облыс еніп отыр. Олардың қатарында Атырау, Қызылорда Маңғыстау облыстары да бар. Кеше республика бойынша екі мыңға жуық адамның короновирус дертіне шалдыққаны белгілі болды. Бірақ "жасыл" аймаққа енген облыстарда статистика біршама төмен. Үкімет мүшелері мен ведомствоаралық кеңес өкілдері алдында сөз сөйлеген денсаулық сақтау министрі Алексей Цой жағымды ақпараттармен бөлісті. Коронавирустың таралу деңгейі алдыңғы айлармен салыстырғанда 30 пайызға төмендеген.
Үлкендер әлі де сақтық шаралары қамтамасыз етілуі керек, арқаны кеңге салатын уақыт әлі келген жоқ деп есептейді. Ал, жастар жағы дәмханалар мен түрлі көңіл көтеретін орталықтар, түнгі клубтардың жұмыс жасау уақыты ұзартылатынын естіп, қуанып жатыр. Жалпы республика бойынша халықты індетке қарсы вакцинациялау жұмыстары 60 пайызға жеткен. Ұжымдық иммунитетті қалыптастыру шаралары күшейтілген сайын қауіп төмендеуде. Денсаулық сақтау министрі Алексей Цойдың мәліметтері бойынша, енді шектеу шаралары жұмсара бастады. Мәселен "жасыл" аймақта орналасқан үлкен қалаларда "Ashyq" жобасын толық жүзеге асырып отырған қоғамдық орындарға таңғы сағат 5-ке дейін жұмыс істеуге рұқсат беріледі.