Өңір басшысы Оңдасын Оразалин қаламыздағы жол құрылысы мен көшелерді абаттандыру жұмыстарын тексерді. Қалабасы Асхат Шахаровпен бірге Ә.Молдағұлова даңғылы мен "Нұр-Ақтөбе" ауданындағы гүлзар құрылысы алаңында болды. Сондай-ақ Мәскеу ауданында жөнделіп жатқан 13 көшені аралады. Қарғалы ауылында №53- орта мектеп 10 жылдан астам уақыттан бері үш ауысымда білім беріп келеді. Бүгінде орын тапшылығын жою үшін мектепке қосымша ғимарат салынған. Бұрын 700 оқушыға арналған білім ордасы 2000 орынға кеңейтілді. Мұндай жұмыстар №13,23,68-ші орта мектептерде де жүргізілді. Осылайша үш ауысымда оқытатын мектептердің саны азайып келеді. Айта кету керек өңірде тағы осындай 4 мектеп қалып тұр.
Бүгінде Әлия Молдағұлова даңғылындағы "Шахматшылар" гүлзары абаттандырылып жатыр. Нысанның ұзындығы 540 метр. Алдағы уақытта 120 дана жарықшам, 60 дана орындық пен қоқыс жәшігі орнатылады. Жоба құны 150 миллион теңге. Жарақтандыру жұмыстары қараша айының ортасында аяқталады. "Нұр Ақтөбенің" 1-шағын ауданында жаңа гүлзар бой көтереді. Гүлзардың аумағы 24 мың шаршы метр. Оның құрылысына жергілікті қазынадан 195 млн теңге бөлінген. Сол қаражатқа "Ка Нур Строй Сервис" серіктестігі 13 әткеншек, 150-ге жуық жарықшам мен 47 қоқыс жәшігін орнатады. Әрі 15 000 шаршы метрге жуық жаяу жүргіншілер жолы салынады. Сондай-ақ, биыл Мәскеу ауданында 13 көше орташа жөндеуден өтті. Жөндеу жұмыстарына жауапты "Ерхат-Жолдары" серіктестігі. Мердігер компания асфальттің бірінші және екінші қабатын төсеген. С.Сейфуллин көшесін жөндеу жұмыстары аяқталуға жақын. Жалпы 13 көшені орташа жөндеу жұмыстарына барлығы 645 миллион теңге жаратылды. Облыс әкімі Оңдасын Оразалин атқарылып жатқан жұмыстарымен танысты. Жауаптыларға тапсырма жүктеп, қыс түспей барлығын аяқтауды тапсырды.