"Локомотив" кинотеатрында бүгін қаланың ескі бөлігінде орналасқан мектептердің оқушылары жол ережесіне қатысты «Жолдос көмекке асығады» атты тұңғыш қазақстандық анимациялық оқыту сериалын тамашалады. Балалар Жолдос атты басты кейіпкердің нұсқауымен жол бойы орнатылған белгілердің мәнісіне терең үңілді. Мультипликациялық фильмді көрсетуге облыстық жол полициясы басқармасы мен "Нұр Отан" ХДП жергілікті филиалы мұрындық болыпты. Мультфильм қазақ және орыс тілдеріндегі: «Жолаушы болу оңай емес!», «Велосипедтің рулінде - сен жүргізушісің! Ал роликтерде - жаяу жүргіншісің!», «Жүргізушінің қасында - қырағы бол!» атты он минуттық үш сериядан тұрады. Олардың әрқайсысында белгілі бір қауіпті жол оқиғасы келтірілген және одан шығу жолдары бойынша түсініктемелер беріледі. Жолдос фильмнің кейіпкерлерін жолда қауіпсіз жүруге үйретуден басқа, керемет күш, асқан жылдамдық, кеңістікте шапшаң ауысу сияқты қарапайым адамдарда жоқ өзінің ғажайып қабілеттерімен жолдарда болуы мүмкін апаттардың алдын алады.