Жұмысшы жастар бүгін Нұр Отан партиясының облыстық филиалы ғимаратына жиналды. "Бәсекеге қабілетті жас маман - жарқын болашақ кепілі" атты халықаралық жұмысшы жастар слетіне өңірімізбен қатар Маңғыстау мен Батыс Қазақстан облыстары, көрші Орск, Орынбор қалаларының жастары қатысты. Мамандықтарын мақтаныш ететін көшбасшылар бір-бірімен тәжірибе алмасты. Өндіріс саласында үздік маман атанғандардың бірі - Нұркен Әжмұратов. "СНПС Ақтөбемұнайгаз" АҚ-да қызмет ететін жігіт еңбек жолын қарапайым жұмысшыдан бастаған. Бүгін де білікті инженер. Жоғарыға білімің мен еңбекқорлығыңның арқасында өрлеуге болады дейді ол. Тәжірибесіз үздік атану мүмкін емес. Ал Дәурен Нығметоллин Орал қаласының өкілі. Батыс Қазақстан инженерлік-технология университетін 2010 жылы тәмамдағаннан кейін бірден жұмысқа орналасқан. Инженер, кейін механик болды, қазір бөлім басшысы қызметінде. Өз өңіріндегі жастармен жұмысты, өндіріс орнындағы жастар үшін жасалатын жағдайды бүгінгі слетқа жиналғандарға баяндады. Халықаралық слетқа шақырылған қонақтар еркін форматта пікір алмасып, ұсыныс-тілектерін білдірді. Мамандық таңдауда көмек, жастардың өсуіне сеп болады деген ниетпен слетқа шаһардағы колледж студенттері де шақыртылған. Алайда, болашағынан үміт күттірер жастарымыздың біразын бүгінгі шара қызықтырмағанға ұқсайды. Слет кезінде көз шырымын алғандар көп болды.