Әскери қалашық көшесінің тұрғындары қала басшылығынан аулаларына балалар алаңын орнатып беруді осымен үшінші жыл қатарынан сұрап келеді. Оған қоса көшеде жарықшамдар мүлдем жоқ.Әскери қалашық көшесіндегі мына екі қатарлы тұрғын үйлердің ауласында ескі гараждардан басқа түк жоқ. Әр тұрғын үйде кемінде 12 пәтер бар. Бір аулада 8 үй тұр. Пәтер иелері осыдан екі жыл бұрын ақпан айында қалалық тұрғын үй-коммуналдық шаруашылығы бөліміне хат жолдап, аулаға балалар ойнайтын алаң мен жарықшамдар орнатуды сұраған. Бұл өтінішпен сол кездегі қала басшысына да кірген.
Тұрғындардың арызына тұрғын үй-коммуналдық шаруашылық бөлімінің басшысы жауап қатқан. Онда қалада балалар алаңына қажеттілік бойынша жеке және заңды тұлғалардан келіп түскен арыз 200-ден асатыны айтылған. Мұндай жұмыс көлемін бір жылда орындау мүмкін емес делінген. Атап өтейік, ағымдағы жылдан қала тізгінін ұстаған Асхат Шахаров көпқабатты үйлердің аулаларын абаттандыру, балалар алаңдарын орнату бойынша жұмыстарды қолға алатынын айтқан еді. Қалабасы 100 балалар алаңқайын және 50 спорттық алаң, жасанды жасыл төсеніші бар 10 футбол алаңын салып беруге уәде етті. Қала әкімдігінің баспасөз қызметінің мәліметінше, қазір 20-дан астам балалар, 15 шақты спорттық және 6 футбол алаңдары жабдықталды. Бұл бағыттағы жұмыстар жалғасын табады.