"Оқы және өзгеге ұсын" марафоны аясында Сағи Жиенбаев атындағы облыстық жасөспірімдер кітапханасы тұрғындарды кітап оқуға шақырады. Аталмыш марафон 2011 жылдан бері жалғасын тауып келеді. Бүгін кітапхана қызметкерлері "Қазпошта" мекемесіне 300 - дей кітап табыстады. Қазпоштаға шаруасымен келген адам сөрелердегі әдебиеттерді алып, оқуына болады. Қаламызда С. Жиенбаев атындағы облыстық жасөспірімдер кітапханасы кезекті "Оқы және өзгеге ұсын" атты марафонын бастап кетті. Марафон мақсаты қала тұрғындарының арасында қазақ көркем әдебиетін және орыс классиктері шығармаларын насихаттау, дейді кітапхана қызметкерлері. Осыған орай бүгін "Қазпошта" мекемесіне 300 - дей кітап табысталды. Бұл әдебиеттер кітапхана есебінде тіркелмеген, барлығы да зейнеткерлерден немесе басқа жаққа қоныс аударғалы жатқан адамдардан қабылданған. Әдебиеттер арасынан Ә. Кекілбай, О.Сүлейменов, Ш.Айтматов секілді әйгілі ақын-жазушылар қолға түспейтін еңбектерін, тіпті М.Әуезовтың "Абай жолы" эпопеясын да кездестіруге болады. Кітапхана ұжымы марафонды "Юртапарк" ойын - сауық орталығы, есту қабілеті бұзылған балалар мектеп- интернаты, КА-168/3 түзету мекемесі мен мектептерде кезекпен өткізіледі. Ең ұтымдысы, бұл акция кезінде қолға түсірген кітапты кітапханаға қайта тапсырмауға да болады. Оқып тауысқан соң өзгеге оқуға беру бұл марафонды өміршең етеді. "Қазпошта" қызметкерлері әдебиеттерді қабылдап, кітапханашыларға алғысын білдірді. Бұдан былай, поштаға шаруасымен келіп, кезек күтіп қалған жағдайда ақтөбеліктер дуақыттарын бос өткізбей, көркем әдебиет туындыларымен таныса алады.