Бүгін физика-математика бағытындағы Назарбаев зияткерлік мектебінде алғашқы қоңырау соғылды. Салтанатты жиынға облыс әкімі Архимед Мұхамбетов, "Назарбаев зияткерлік мектептері" дербес білім беру ұйымының Басқарма төрайымы Күләш Шәмшидиновалар қатысты. Шарада Назарбаев зияткерлік мектебінің директоры Сәуле Өмірбековаға мектептің кілті табыс етілді. 720 орынға есептелген білім ордасына 7-8-9 сыныптарға 574 оқушы қабылданған. Елдің 8 қаласында бүгінге дейін 9 Назарбаев зияткерлік мектебі ашылған. Назарбаев мектебінде білім алып жатқан оқушылар деңгейі өте жоғары отандық және халықаралық білім сайыстарына ғана қатысатын болады. Ал ұлттық бірыңғай тестілеуге қатысу әр оқушының өз еркі. Бірақ, бұл мектеп түлектерінен одан да күрделі емтихан алынады. Оған Кембридж университетінің арнайы комиссиясы атсалысады. Ал оқушылардың өз білімдерін шыңдай түсуі үшін білім ордасында бар жағдай қарастырылған. Аудандардан келген балаларға 120 орындық интернаты бар. Мектеп ғимаратына 59 кеңсе, зертханалар, педогогикалық және ақпараттық технологияларды интеграциялау орталығы, жеке сабақ беру және психологиялық бейімдеу кабинеттері, 360 орындық асхана, қысқы бақ сыйған. Био және нанотехногиялық зертханалар, роботатехника, 159-дан астам компьютер, 660 ноутбук, 60 интерактивті тақтамен жабдықталған. Бұл мектепте 97 педагог сабақ беретін болады. 20 мұғалім шет елдерден шақыртылған. Ал мектеп аумағында 5400 шаршы метр аумақта футбол, волейбол, баскетбол, хоккей алаңдары, теннис корты бар заманауи спорт кешені орналасқан. Бұл мектепте балалар ертеңнен бастап сабақ оқуға кіріседі.