Халықтың әлеуметтік көмек тағайындаудың жаңа ережелеріне қатысты ешқандай сұрағы болмауы қажет. Бүгін өңірімізге жұмыс сапарымен келген Еңбек және халықты әлеуметтік қорғау вице-министрі Нариман Мұқышев осылай деп мәлімдеме жасады. Үкімет өкілі қалалық халықты жұмыспен қамту орталығының жұмысымен танысты. Зейнетақы қорындағы жарнаны пайдалану, тұрғындарды дәрі-дәрмекпен қамту және өзге де маңызды мәселелер талқыланды. Қалалық жұмыспен қамту орталығын аралап, атаулы әлеуметтік көмек алып отырған азаматтардың санын сұрап білді. Қазір еліміз бойынша 2 млн 200 мың тұрғын мемлекеттен ақшалай жәрдемақы алып отыр. Оның басым бөлігі бала. Жұмыссыздық деңгейін төмендету үшін елімізде жыл сайын 330-370 мың жаңа жұмыс орнын ашу қажет деді вице-министр. Осы ретте жоғары оқу орындары нарықта сұранысқа ие мамандарды даярлауы керек. Жақында ғана қабылданған көп балалы және мұқтаж отбасыларды қолдаудың кешенді бағдарламасы толықтай түсіндіріліп жатыр. Мүмкіндігі шектеулі жандарға арналған әлеуметтік қызметтер порталы дайындалды. Сондықтан әр аймақтағы орталық басшыларына алдағы айларда осы мәскелеге басымдық жасауға тапсырма берді. Сондай-ақ вице-министр бүгін қоғамдық көлікке мініп, электронды төлем жасау жүйесін қарады. Одан өзге медициналық «Жайна» оңалту орталығының жұмысымен танысты.