Өңірде эпидемиологиялық жағдай тұрақты болғанымен ауру кез келген уақытта өршуі мүмкін. Бұл туралы бүгін өңірлік коммуникациялар қызметінде өткен брифингте айтылды. Келесі айда ақтөбеліктерді коронавирусқа қарсы вакцинациялау басталуы да мүмкін. Алайда нақты шешім қабылданған жоқ.
Ақтөбе облысы "жасыл" аумақта. Алайда көрші облыстарда жағдай тұрақсыз. Сондықтан бізге де қандай жағдайға болмасын ұдайы дайындықта отыру қажет. Соңғы 5 күнде инфекция жұқтырудың 31 жағдайы тіркелген. Оның 4 -еуі кеше анықталған. Инфекция жұқтырғандар Алға , Мартөк ауданынан және қала аумағының тұрғындары. Ал пневмониямен тіркелгендер саны екеу. Былтырғы наурыздан бері өңір бойынша 3784 науқас анықталса, оның 3655 -і айығып шыққан.Жалпы өңірде карантин шараларының сақталуын мобильді топтар бақылауда. Мониторинг жүргізіліп тұрады. Бүгінге дейін талап бұзғандардан мемлекетке 176 миллион теңге өндірілген.