19 тамыз – Қазақстан Республикасының спорт күні. Карантин шектеулеріне байланысты мейрам салтанатты түрде аталып өтпесе де, спортшылар марапатсыз қалған жоқ. Мереке қарсаңында облыстың сексеннен аса спортшысы мен спорт қызметкерлері ведомостволық наградаларға ие болып, облыс әкімінің "Алғыс хатымен" марапатталды.
Кәсіби мерекелері қарсаңында облыстың намысын қорғап, талай жарыстан жеңіспен оралған спортшылар мен салауатты өмір салтын қалыптастыруда аянбай еңбек еткен спорт саласының қызметкерлері марапатталды. Атап айтар болсақ, өңірден бес спортшы Қазақстан Республикасының мәдениет және спорт министрлігінің ведомстволық наградасымен, 8 спортшы "Құрмет грамотасымен", 12 спортшы Спорт және денешынықтыру Комитеті Төрағасының "Алғыс хатымен" марапатталды. Сондай-ақ, 23 спортшы облыс әкімінің "Алғыс хатын" иеленді. 16 спорт ардагері "Ақтөбенің 150 жылдығы" медалімен марапатталды. Ал 8 спортшыға Салалық кәсіподақ комитетінің "Құрмет грамотасы" табысталды. 29 спортшыға облыстық дене шынықтыру және спорт басқармасы басшысының "Алғыс хаты" берілді.
Облыста олимпиада лицензиясын жеңіп алған спортшылар да бар. Биыл пандемияға байланысты Жапонияда өтетін жазғы олимпиада ойындары келесі жылға ауыстырылған еді. Бұл олимпиадаға облыстан Мейрамбек Айнағұлов пен Нұрислам Санаев еркін күрестен, Виталий Худяков жүзуден лицензия жеңіп алған. Келесі жылы олимпадаға қатысушылар қатарын еркін күрестен Азия чемпионы Юсуф Батурмурзаев және байдарка-каноэнің шеберлері Тимур Хайдаров пен Виталий Капила толықтырады деп күтілуде.