Облыста бүгін күн райының бұзылуына байланысты ескерту жарияланды. Жел күшейіп, далалықта боран соғуы мүмкін. Осыған орай, бүгін облыс әкімінің орынбасары Серік Төленбергенов республикалық жолдардың қысқы күтіміне жауапты "Қазавтожол" мекемесінің дайындығын тексерді. Заречныйдағы №8 жол пайдалану телімінде орналасқан жылыту бекетінде болып, техниканы қарады. Ақтөбедегі республикалық маңызы бар 1 мың 900 шақырым жолдың тоқсан пайызын қыс бойы күтіп-ұстау "Қазавтожол" мекемесіне жүктелген. Мекеме басшысы облыс жолдарын уақытылы тазартып тұруға шамамыз жетеді дейді. "Қазавтожолдың" иелегінде қазір 78 көлік бар. Бұл қажеттіліктің 54 пайызы. Жетпейтін техника жалға алынады. Бұдан басқа, 7 мың текше метр құм, 600 тонна тұз, 210 тонна көмір қоры дайындалған. Жолдарға 70 "Тайғақ жол" белгісі қойылды. "Қазавтожолдағылар" жол полициясының сылбырлығын сынға алды. Жол полициясы қар басып қалған жол бөлігін жабуға асықпайды. Ал, ескертуге құлақ аспаған көлік жүргізушілері жолға шығып кетіп, кейін кептеліс жасап, қар аршу жұмыстарына кедергі келтіреді, дейді мамандар. Биыл республикалық маңызы бар автомобиль жолдарының қысқы күтіміне 410 миллион теңге бөлінген.