Ауа райы әлі мың құбылады. Қар да жауады, көктайғақ та болады. Наурыздың алғашқы тоқсанының басында орташа температура әдеттегіден 1-2 градусқа жылырақ болады. Есесіне, соңына қарай күндіз -9 градусқа дейін суытады. Жылдамдығы секундына 20 метрге жететін жел тұруы мүмкін. Күндіз- жылы, түнде салқын болады. "Қазгидрометтің" алдағы наурыз айының ауа райына жасап отырған болжамы-осындай. "Қазгидромет" кәсіпорнының облыстық филиалының өкілі Жанна Асқарованың айтуынша, күннің күрт жылынып кетуі байқалмайды. Көктем әдеттегі уақытымен шығады. "Қазгидрометтің" болжамы көңілге қонымды болғанымен, қала әкімі арнайы қызметтердің басшыларын жағдайды бақылаудан шығарып алмауға шақырды. Жиын кезінде баяндама жасаған мекеме басшылары көктемгі су тасқынының алдын алуға тастүйін дайын отырғандықтарын айтты. Қала көшелерінің қарын шығару жұмыстары оныншы ақпанда басталып кетті. Су ағатын арықтар жазда тазартылып қойған. Жылдағыдай көктемгі су тасқынына қарсы штаб 11 шағын ауданда жұмыс жасайды. Жиын кезінде су қоймаларының дайындығы да пысықталды. Ақтөбе су қоймасының сыйымдылығы- 245 млн текше метр. Қазір 91 млн текше метрі бос тұр. Бұған қоса Қарғалының 280 шаршы метрлік және Саздының 6 млн текше метрлік су қоймалары еріген қар суын қабылдауға әзір. Осыдан екі жыл бұрын қаланың іргесіндегі Мағаджан орман шаруашылығы маңында төтенше жағдай болған еді. Қыс бойы жауған қар еріп, лай су ауылға қарай аққан. Екпінмен аққан еріген суды көпір астындағы құбырлар өткізіп үлгермей, көшелерді су шайып кеткен болатын. Қала әкімі Ерхан Омаров осындай жағдай тағы да қайталанбас үшін қала әкімі аппаратының әскери-жұмылдыру, азаматтық қорғаныс және төтенше жағдайлар бөлімінің басшыларына су басып кету қаупі бар аумақтарды аралап, саяжайларды паналап отырған тұрғындарға су тасқыны қауіпі бар аймақтардан кету қажеттігін хабарлауды тапсырды. Селолық округ әкімдері мен қалалық білім бөлімінің бастығына мәжіліс және спорт залдарын дайындауды , төтенше жағдай туындаса, жас туристер стансасының бөлмелері тұрғындарды қабылдауға даяр болу қажеттігін ескертті.