Бүгін - Халықаралық энергия үнемдеу күні. Энергияны қаншалықты үнемдеп жүрміз? Қарапайым жарық шамдарын жиі пайдаланамыз ба? Бұл күні көптеген елде түрлі шаралар ұйымдастырылады. Қазір қарапайым жарық шамдары аса сұраныста жоқ. Оның орнын бірнеше жыл бұрын энергоэнемдеу шамдары басқан болатын. Әсіресе, түрлі-түсті шамдар халықтың сұранысына ие болды. Адам көзін шаршатпайды. Ақтөбеліктер де халықаралық энергия үнемдеу күнінің болғанын құптап отыр. Бір күн болса да энергияны үнемдеу қажет деп есептейді.
Әйтсе де, энергоүнемдеу шамдарын жою мәселесі әлі шешілмеген. Шам сынып немесе жарамсыз болып қалса, кез келген қоқыс жәшігіне тастауға болмайды. Себебі, құрамында сынап бар. Дегенмен, мамандар қазір энергоүнемдеуші шамдардың қолданыстан кетіп бара жатқанын айтады. Дүкен сөрелерінде жарықдиодты шамдар толып тұр. Энергоүнемдеуші шамдарға қарағанда 10 есеге дейін жарық береді. 30 мың сағатқа дейін қолдануға болады. Бағалары да қолжетімді. 380 теңгеден 2000 теңгеге дейін саудаланады. Халықаралық энергия үнемдеу күні «Ресурстар мен энергияны пайдалану бойынша мектеп жобасы» халықаралық экологиялық желісі бастамасымен жарияланған. 2008 жылы сәуірде бұл күн Қазақстанда өткен SPARE үйлестірушілерінің халықаралық кеңесінде мереке ретінде бекітілген. Сол жылдың қарашасында әлемде бірінші рет энергия жабдықтау күні атап өтіліп, мейрам халықаралық мәртебеге ие болды. Датаны белгілеудегі мақсат ресурстар мен энергия көздерін тиімді пайдалану үшін билік пен қоғамның назарын аударту.