Екінші тоқсанда мектептер дәстүрлі оқу жүйесіне көше ме? Бүгін облыстық білім басқармасының басшысы Ләззат Оразбаева өңірлік коммуникациялар қызметінде өткен брифингте аймақтағы бірінші оқу тоқсанын қорытындылап, алдағы жоспарлар туралы айтты. Елде санитарлық-эпидемиологиялық жағдай түзелсе ғана оқушылар мектептерге оралады. Соңғы шешімді Мемелекеттің бас санитарлық дәрігері қабылдайды. "Онлайн сабақ - білім сапасын төмендетеді". Осылай деген облыстың бас ұстазы жағдай дұрысталғанда ғана мектептер толық дәстүрлі оқуға көшетінін мәлімдеді. Ең бастысы - білім алушылар мен тәрбиеленушілердің денсаулығы мен қауіпсіздігін қамтамасыз ету. Қазір облыс бойынша 403 мектеп бар. Аудандарда 219 мектепте 18 мыңнан астам оқушы дәстүрлі форматта оқиды. 184 мектеп аралас форматта білім береді. Жаңа оқу жылында үй тапсырмасы оқу тапсырмасына ауыстырылды. Ләззат Оразбаева ата-аналар тарапынан "мұғалімдер жаңа сабақты түсіндірмейді" деген әңгіменің көп екенін тілге тиек етті. Жаңа оқу жылында күрделі жөндеу бітпеген және санитарлық талапқа сай емес №33-ші және 42-ші орта мектептерінде кезекші сынып ашылмаған. Сондай-ақ, мониторингтік комиссияның тексеруі кезінде бірнеше білім мекемелерінде санитарлық құрал-жабдықтардың талапқа сай қоры болмай шықты. Басқарма басшысы бұл мәселелер бақылауда екенін атап өтті. Қазір аудандарда және қалада call орталықтары жұмыс істейді. Ата -аналар туындаған сұрақтар бойынша: 55-17-92 және 8702 031 25 22 нөміріне, сондай-ақ Ләззат Оразбаеваның 8 701 722 05 63 жеке нөміріне хабарласа алады.