Биылғы ұлттық бірыңғай тестілеуді өткізу ережесінде өзгерістер жоқ. Сынақтың уақыты, тәртібі және өткізілетін орыны бұрынғысынша. Бұл жөнінде бүгін Ұлттық тестілеу орталығының директоры Қали Әбдиев хабарлады. Астаналық мейман мектеп бітірушілерді ҰБТ-ға дайындау мәселелері бойынша кеңейтілген ақпараттық-түсіндіру жұмыстарын өткізу үшін Ақтөбеге арнайы келген. ҰБТ биыл осымен оныншы рет өткізілгелі тұр. 10 жылдың ішінде сынақты ел бойынша 1 миллион 200 мыңнан астам түлек тапсырған. Білім беру жүйесіне 2004 жылы енгізілген бұл әдіс бүгінде тиімділігін дәлелдеді. Емтиханды өткізудің жүйесі қалыптасып, оқушы білімін әділ, әрі тез бағалаудың амалы табылды. Бұл - Білім және ғылым министрлігі Ұлттық тестілеу орталығының директоры Қали Әбдиевтің пікірі. Қали Әбдиевтің айтуынша, басты мәселе - баланы тестілеуге дайындаудың жақсы әдісін табу. Оқушылар қазір тест сұрақтары мен жауаптарын жаттап алып жүр. Емтихан кезінде онсыз да толқып отырған оқушы жаттаған нәрселерін ұмытып қалады. Сондықтан, ұстаздың міндеті - сабақты жаттанды емес, баланың жадында қалатындай етіп ұғындыру. Ақтөбедегі оқу-әдістемелік орталығының мамандары, мәселен, математика пәніне дайындалудың жаңа бағдарламасын әзірлеген. Тест нәтижелерін жақсартамыз деп, өзге сабақтарды бір шетке ығыстыру үрдісі қалыптасты қазір біздің мектептерде. Түлектер сынақтың негізгі төрт пәні: қазақ тілі, орыс тілі, Қазақстан тарихы, математикаға және таңдау пәніне көп көңіл бөледі. Басқа сабақтар өткізілмейді де. Елде 140 мыңнан астам оқушы мектеп бітіреді. Біріктірілген емтиханға оның қаншасы қатысатыны әзір белгісіз. Кеше ғана мәжіліс депутаты Дариға Назарбаева ҰБТ жүйесін сынап, жоғары оқу орнына түсу алдында балаға таңдау құқын беріп, оны заңдастыруды ұсынды. Түлек не ҰБТ тапсырсын, не мектепте емтихан тапсырсын деді депутат. Бұл ҰБТ төңірегіндегі дүрбелеңді азайтуға мүмкіндік береді деп есептейді халық қалаулысы. Және тест тапсырмаларының мазмұны да жақсартуды қажет етеді деді депутат. Бұл ұсыныстардан қандай нәтиже шығарын алдағы жаз көрсетеді.