Қала ішіндегі жолдарды да қар басты. Жол күтіміне жауапты мекемелер тығырыққа тірелді. Техника мен жұмыс күші жеткілікті дегенмен толассыз жауған қарға төтеп беру мүмкін болмады. Әдеттегідей басты назарда басты көшелер. Әбілқайыр хан даңғылы бойындағы орталық көше толықтай тазартылғанымен, тротуарлар назардан тыс қалып қойған. Қаланың ескі бөлігінде де осындай жағдай. Матросов көшесін қардан тазартуға арнайы техника мен жұмысшылар жұмылдырылған. Ал Жанқожа батыр көшесінің бойында қар аршып жүрген ешкім жоқ. Бүгін қалаға іргелес ауыл жолдары басты назарда. Сондай - ақ қоғамдық көліктерге кедергі болмас үшін, мектеп автобустары үздіксіз қатынайтын көшелердің қары арнайы техникалармен қала сыртына тасымалдануда. Бір айдан соң көктем басталады. Алайда наурыз айының қандай мінез танытатынын уақыт көрсетеді. Ең бастысы жауапты мекемелер қар еріген уақытта көшелерді су басудан сақтану қажеттігін естен шығармаса болғаны. Тұрғындарды да осы мәселе алаңдатады.