Жақында халықаралық "Үздік адамдар" энциклопедиясына енген жерлестеріміздің есімі белгілі болды. Бұл жолғы үздіктердің тізіміне 30-ға жуық ақтөбелік ілінген. Басым көпшілігі аймаққа аты танымал кәсіпкерлер мен өнер және қоғам қайраткерлері. Олардың қатарында Қазақ КСР-на еңбегі сіңген жаттықтырушы, жерлесіміз Владимир Кореньков та бар. Өз өмірінің басым бөлігін спорт саласына арнаған Владимир Кореньковтың асқан асулары мен бағындырған белестері аз емес. Белгілі жаттықтырушының ізбасарлары да жетерлік. Оның бірқатары ел көлеміндегі спорттық шараларда топ жарып жүрсе енді бірі әлемдік біріншіліктерде үздік атанып, танымал тұлғаларға айналған. Ұзақ жылдар бойы спорт саласында басшылық қызметтерді атқарған Владимир Кореньковтың қазіргі атқамінерлерге айтар ақыл-кеңесі де аз емес. Жаттықтырушының айтуынша облысымызда спорттың белгілі бір түрлеріне ғана айрықша көңіл бөлінуде. Ақтөбенің өзінде футбол ойындарына арналған бірнеше алаң бар, алайда қысқы спорт түрлеріне арналған спорттық кешендер аз. Халықаралық "Үздік адамдар" энциклопедиясы өткен жылдан бастап жарық көре бастады. Мәскеуде басып шығарылатын бұл жинақ Ресей, Белоруссия, Қазақстан, Украина елдерінің белгілі тұлғаларын анықтауға арналған.