Оқу жылының басталуына тура он күн қалды. Қаланың білім ошақтарында "Мектепке жол" акциясы бастауын алды. Бүгін қалалық оқушылар сарайында 100 оқушыға мектепке қажетті киім-кешек, сөмке, қалам, дәптер табысталды. Оқушылардың барлығы көп балалы отбасылардан. Сабақтарын жақсы оқып, қоғамдық шараларға белсене араласады.
Внера Төкешова көп балалы ана. Кішкентайын биыл 1-ші сыныпқа дайындап жүр. Үлкені 7-ші сыныпқа көшпекші. Екінші ұлы 4-ші сыныпқа барады. Өткен сенбі-жексенбі күндері базарлаған келіншек балаларына қажетті киім-кешекті жартылай ғана сатып алыпты. Бүгін өздеріне қажет болып жүрген сөмкесін қайырымды жандардан алғанына дән риза. Әйтпесе отағасының 100 мың теңге айлығы үш баланы толықтай киіндіруге жетпейді. "Мектепке жол" акциясы аясында 100 оқушыға қажетті сабақ құралдары үлестірілді. Төменгі сынып оқушыларына мектеп формасы мен дәптер, қалам табысталды. Жоғары сынып оқушыларына сөмке мен аяқ киімдер әкелінген. Жылдағы дәстүр бойынша қыркүйек айының ортасына дейін "Мектепке жол" акциясы жалғасады. Жергілікті кәсіпкерлер тұрмысы төмен отбасылардың балаларына мектеп құралдарын алып беруге ынталы.